هل آخذ Prozac 20mg ؟؟

السلام عليكم ورحمة الله وبركاته دكتورنا الفاضل اولا جزاك الله خير الجزاء على ما تقدمه وجعله في موازين حسناتك. استفساري بعد اذن حضرتك كالتالي : انا بعاني أحيانا من القلق واللي بيتمثل في اني بحس بكتمة وعملية التنفس ما بتبقاش تلقائية لا شعورية بل بحس اني انا بتدخل فيها وبحاول اخذ نفس عميق ومابقدرش . الحالة دي بتجيلي لو توثرت او زعلت او عندي تخوف من حاجة . كمان مؤخرا وخلال سنتين بقى عندي قلق من ركوب الطائرة مع العلم اكثر من 5 سنين كنت بركبها عادي مابحسش بحاجة نهائيا لكن بعدما شاهدت برنامج عن حوادث الطيران بقى عندي قلق منها . بحيث اسبوع قبل السفر تقريبا وانا قلقة و تنفسي بحسه مضطرب و بحس إنه عندي هبوط شديد في الضغط والحالة دي بتشتد خلال السفر لكنها بتختفي بمجرد نزول الطائرة على المدرج !! بقيت بخاف اصلا من حالة القلق اللي بتجيلي وبخاف اتعب جدا وانا جوة الطائرة خصوصا مع اختلاف الضغط داخل الطائرة بخاف اتخنق وانا في الجو !! لكن في الايام العادية لو حد زعلني او توترت شوية بحس بكتمة النفس رجعت لي وبتستمر معايا ممكن طول اليوم خصوصا لما بفكر فيها لكن لو انشغلت بحاجة بتختفي . النهاردة روحت لدكتور نفسي وحكيت لو الأعراض دي وكتب لي على حبوب Prozac 20mg . ولما بحث في الانترنت في المواقع الطبية و الاستشارات اكتشفت انه ممكن يعمل اثار جانبية عديدة مع العلم ان الدكتور قالي انه ده أخف الأدوية من حيث الآثار . عشان كده انا خفت اخده وقولت ححاول اعالج نفسي بنفسي واغير أفكاري وابتعد عن نقاش اي موضوع ممكن يتعبني . . . الخ فمش عارفة اعمل ايه اخذ الدواء ولا لاء ؟ خصوصا اني خايفة ابدأه وتطول مدة العلاج ! او تختفي الاعراض اثناء العلاج وترجع لو وقفه لي الدكتور ؟ ياريت تنصحني يا دكتور وشكرا جزيلا سلفا .